نتيجة:

نصائح لكل الي داخلين الجيش (49 نصيحة مهمة) و حاجات تجيبوها و انتوا رايحين مركز التدريب

نصائح لكل الي داخلين الجيش "49 نصيحة مهمة" و حاجات تجيبوها و انتوا رايحين مركز التدريب

نصائح لكل الي داخلين الجيش 49 نصيحة مهمة و حاجات تجيبوها و انتوا رايحين مركز التدريب

نصائح لكل اخوتنا الي داخلين الجيش ربنا معاكوا وتروحوا وترجعوا بالسلامة 
خلي بالكم من شوية النصائح دول 
بمناسبة ان اليومين الجايين دول موسم دخول الجيش وكده .. دول 49 نصيحة مهمة و حاجات تجيبوها و انتوا رايحين مركز التدريب
-------------
1- فلوس مش اقل من 600 جنيه
2- ادوية للبرد - الكحة - الامساك - الاسهال - استحلاب للزور -الصداع - مرهم للكدمات - مسكن
3- 3 اقفال كومبيوتر يكونوا نضاف عشان ميتكسروش و يكونوا حجم متوسط بلاش الكبير عشان مش هينفع
4- غيارات داخلية
5- بودرة رجلين
6- مزيل عرق
7- فرش جزمة طبي هتلاقيه ب 10 جنيه تقريبا من عند اي ورشة جزم هيفيدك عشان البيادة ناشفة
8- مكن حلاقة علي قد ما ربنا يديك و بلاش جيليت بلو 3 مش هتنفع معاكوا خليكوا في جيليت بلو 2 و هاتوا الكيس الكبير تقريبا هتحلقوا مرة كل يومين لو دقنك خفيفة و لو تقيلة كل يوم
9- يستحسن لو فووم حلاقة او جيل عشان تنجز بدل كريم الحلاقة و الفرشة و هات افتر شيف عشان التهابات بعد الحلاقة
10- فرشة سنان و لو مش بتغسل سنانك هتغسل في الجيش
11- معجون بقي عشان فرشة السنان
12- معلقة و دي حاجة مهمة جدا عشان الاكل و دايما حافظ عليها و سيبها في جيب الافارول عشان متنسهاش لو دخلت الميس (المكان اللي بتاكلوا فيه) من غيرها هتضطر يا تقوم يا تاكل بالكارنيه
13- خرطوم متر عشان الحمام بس لو عايز الاحسن لان احيانا بيمنعو دخول الخراطيم في شطافة بتتباع عشان الناس اللي بتسافر اسمها فريش باز سعرها 110 جنيه موجودة في الصيدليات الكبيرة زي العزبي هتنفعك خصوصا لما تكون المية مقطوعة و دا العادي يعني بس خليها دايما مليانة و خلي معاك ازازة مية شايلها للاستخدام في الحمام في دولابك
14- ليفة عشان تستحمي
15- صابون و صبانة بغطا و شامبو اكياس عشان تستخدم مرة و ترمي
16- فوطة
17- 3 اربطة جزمة بيج عشان لو رباط البيادة اتقطع
18- ممكن تاخد معلبات بس مش كتير و ممنوع تماما الاكل العادي طالما مفيش عليه صلاحية مش هيدخل
19- هتحتاج يبقي معاك سندوتشات كتير عشان يوم الترحيل طويل تقريبا اطول يوم ف جيشك
20- شريحة خط موبايل و تكون مشحونة عشان لو عرفت تسلك نفسك و تقفش موبايل من عسكري قديم تتكلم منه لو معرفتش بيبقي في كباين يتليفونات و بيتباع كروت شحن بتاعت مرحبا بس احتياطي تقدر تشتريه من اي سنترال المصرية للاتصالات بيبقي ب 10 جنيه
21- ممكن تاخد معاك موبايل صغير من غير كاميرا تخليه معاك بحيث لما تترحل تطمن اهلك بس اول ما تترحل مركز التدريب و يقولوا اللي معاه موبايل يسلمه في الامانات سلمه عشان لو اتقفش منك في التفتيش هيتكسر قدامك ,, الميزة هنا ان لما تيجي تمشي من مركز التدريب و رايح القوة الاساسية بتاعتك هيبقي معاك الموبايل
22- لما تيجي تحلق احلق علي 1 او نص مش اقل عشان متبقاش زي المساجين ولا اكتر عشان متضطرش تحلق في الجيش بالمكنة بتاعتهم
23 - اكياس اريال الصغيرة عشان هتغسل بأديك هناك
24 - قصافة
25- وايبس و ديتول
26- كشاف صغير عشان الدنيا بتبقي ضلمة بليل في العنبر بيتباع ب 2.5 في المكتبات
27- ساعة تكون بتنور بردو عشان كل حاجة هناك بمواعيد
28- شرابات و نصيحة بلاش تلبس الشراب الميري ولا يووم و الاحسن لو شراب كوتينيل تقيل و طويل عشان رجلك متتعورش في البيادة
29- شبشب و يفضل يكون كروكس مقفول من الجناب عشان لو الحمامات فيها مية ع الارضية ولا حاجة
30- دوبارة تعلق فيها المفاتيح
31- محفظة بسوستة تشيل فيها حاجتك و خليها دايما معاك في جيبك
32- مراية صغيرة عشان لو الحمامات زحمة تعرف تحلق دقنك
33- لما هتدخل هتعرف مصطلحات جديدة زي ميس و كحوول و جيشك حلبة و مستجد و رديف و جراية و زريير و سيكا و اخر واحدة دي الاسم اللي بيطلع علي اي حد اجازاته مستريحة فمتخدش ف بالك
34- قبل ما تروح هتبقي واخد فكرة ان كل الناس اللي هتقابلهم حرامية و كله بيقلب في بعض وده مش حقيقة حتتعرف في الجيش علي شباب كتير رجالة
35- هتقابل ناس جدعة جدا و من كل حتة و هتبقوا صحاب بدون مصلحة و انتوا ف مركز التدريب فبلاش تاخد جنب و متعرفش حد بس بردو اختار اللي تقعد معاهم و خلي المقياس الوحيد الرجولة مش دا منين و دا مؤهل ايه
36- بلاش تشيل كذا شنطة و انت رايح مركز التدريب عشان هتبقي مش عارف تشيلهم ولا تشيل المخلة ولا تشيل البطاطين
37- لو داخل الجيش في الشتا ابقي هات معاك دفاية تحطها تحت البطاطين بتاعة الجيش عشان البطاطين مبتدفيش لوحدها
38 - هتلاقي دايما في حكاية ان في جن و عفاريت ف العنبر و الحمامات كبر دماغك دي حكايات
39- علاقتك بالتونة و الجبنة هتبقي علاقة مش هتتكرر بعد متخرج من الجيش فحاول تحبهم لو مبتحبهمش
40- البس حاجة مريحة و انت رايح يوم الترحيل عشان هتقعد كتير و حافظ عليها عشان لو نزلت اجازة في مركز التدريب
41- ابقي ادخل الحمام بليل عشان مفيش وقت الصبح و هتلاقيه زحمة
42- لو كباين التليفون علي طول عليها ناس و مش عارف تتكلم استني لما كلو ينام و اصحي الساعة 1 او 2 و اتصل براحتك
43- اما تروح وحدتك الاساسية اول حاجة تعملها تسأل العساكر القديمة عن كل حاجة ماشية ازاي في المكان بتاعك عشان تبقي عارف تعمل ايه
44- لو بتعرف كومبيوتر اول ما تروح دور علي العساكر بتوع الكومبيوتر و اتصاحب عليهم عشان ياخدوك معاك المكتب لان المكاتب اريح مكان في الجيش
45- و انت ف مركز التدريب بييجي مناديب من الاسلحة ياخدوا ناس ابعد تماما عن بتوع الصاعقة و المظلات و القوات الخاصة
46- نصيحة بقي للي لسة هيقدم و لسة مراحش كشف طبي لو طلعت بعد الكشف الطبي مكان اسمه الانتقاء و التوجيه هيسألوك انت فيك حاجة قولهم اي حاجة عشان مياخدوكش عشان دول بيودوا علي حرس حدود و صاعقة و قوات خاصة علي طول
47- لو عندك شكوي طبية حقيقية متفقدش الامل و متتكسفش عشان في ناس بتطلع ف افضل اعمل تظلم و متكسلش
48- متخليش اي حد يضايقك ف مركز تدريب لان دوسيهك بيكون مقفول .. و بتتحاسب اول ما تروح القوة الاساسية بس
49- لو معاك واسطة كويسه يبقى كبر دماغك من معظم الكلام الى مكتوب ☝☝..
بالتوفيق

نموذج الاتصال

تعليقات
ليست هناك تعليقات

     اهلا بكم فى مدونة نتائج الامتحانات نقدم لكم كل ماهو جديد فى اخبار التعليم فى مصر واخرالاخبار عن نتائج الامتحانات للطلاب وتنسيق القبول بالكليات والجامعات الحكومية والخاصة وجداول الامتحانات لجميع المراحل التعليمية ..

    تابعونا على صفحتنا على الفيس بوك واخبارنا على جوجل لكى تتمكنو من الحصول على اخر الاخبار التعليمية لحظه بلحظه من مدونة نتيجة الامتحانات الموقع الاول فى مصر المتخصص فى عرض نتائج الطلاب



    وضع القراءة :
    حجم الخط
    +
    16
    -
    تباعد السطور
    +
    2
    -