الاستاذ عبدالله الجبالي خبير اللغة العربية اعلن عن اخطاء كارثية في امتحان اللغة العربية للشعبة العلمية والأدبية
١/ سؤال ي قطعة ( سامي ومفيد ):
سؤال: بين القيمة الفنية للتشبيه في قوله: كان شعور سامي أشبه بطفل يضبط وهو يعبث بشيء نفيس ....
تم وضع أربعة اختيارات منهم اثنين صواب تماما ومن يختار أحدهما فلا حرج عليه ولا خطأ ....
أولا : أنت بتقوله إبراز المشاعر المضطربة للكاتب ... طيب والله صح ... ما هو بيقول ( يضبط ) يعني لما طفل بباه يقبض عليه ويضبطه وهو يعبث بشيء نفيس .. ما اكيد الطفل هيتخض ..... اوعى حد يقول لي أصل ده طفل مش فاهم ... هقولك حبيبي الطفل ده ممكن يبقى عنده عشرة سنوات وفاهم عادي .... فأكيد الكاتب يقصد من كلامه أنه كان مضطرب يعني غير هادئ
ثانيا : أنت بتقوله لإضفاء الحيوية على الصورة حتى يشعر القارئ بمعاناة الكاتب ... طيب قسما بالله تنفع لأنه اي صورة بيعملها الكاتب بيبقى هدفها التأثير في القارئ وأنه يجعل القارئ يشعر بما يشعر به الكاتب .....
حضرتك محدش يقولي بس فيه اختيار أقوى من التاني .... هقولك والله حتى لو فيه ... هل تعلم أنه اللغة العربية حمالة أوجه ولغة مرنة .... هات لي كدة عالم من العلماء القدماء يتفق في الرأي مع عالم اخر ... مستحييييل ... هتلاقي العلماء كل واحد بيفسر المسألة بتفسير مختلف عن الاخر .... وكل التفسيرات صح وتنفع لأنه عليها دليل في الكلام .... كذلك ايضا تفسير القرآن ... هات لي فسر بيشبه التاني ... طيب ما كله بيفسر ويجتهد لأنه الآية القرآنية الشريفة تتحمل كل هذه التفسيرات ... فأرجوكم خلوا عقلكم مرن في التفكيرر ..... ولاحظوا أني بتكلم عن أخطاء الامتحان ... مقلتش الأسئلة بتاعت الاموات كلها خطأ ... بالعكس فيه أسئلة جميلة ... ولكن للأسف أنا لم أر مثل أخطاء امتحان العلمي من قبل ... أخطاء كثيرة .... تعالوا نكمل بقية الأسئلة والاختيارات الخطأ ..
وبالتالي السؤال ده لازم تتوزع درجته ...
_______________________________
٢/ سؤال في أدب المسرحية :
يقول النقاد : إن المسرحية أخت القصة .. إلا أن المسرحية تكتب لتشاهد .... ما معنى هذه الجملة ؟
هذا السؤال لازم تتوزع درجته لأنه فيه اختيارين صح ....
لأنه ببساطة كتاب المدرسة بيقول: المسرحية تكتسب قيمتها من أنها فيها التمثيل والحركة .... طيب هنا بقى سؤالين ....
أولا: هو حضرتك لما تصور المسرحية وتعرضها على الجمهور ... حضرتك كدة عرضتها ممثلة وفيها حركة ولا لا .
ثانيا: هو حضرتك لما تجسد المسرحية على خشبة المسرح يبقى حضرتك مثلتها ولا لا ....اكيد مثلتها وعملت فيها حرمة صح ...
طيب ايه رأيك بقى أنه الاختيارين موجودين في الاختيارات والاتنين فيهما إشارة واضحة جدا على التمثيل والحركة .... اختار مين فيهم أنا ؟؟!!!!!!!!....
وهرجع أقولك بلاش تقولي يا سيدي فيها اختيار أرجح من التاني ... هقولك حتى لو ... بس والله الاتنين ينفعوا ... روح اسأل أي خبير أدب هيقولك اللي أنا بقوله ..
_________________________
٣/ قطعة السلطة الأبوية
سؤال: ما المقصود بمصطلح السلطة الأبوية ...
أيضا يجب توزيع درجة هذا السؤال ....
أولا : حضرتك لما تكون قاسيا على أفراد أسرتك يبقى حضرتك شايف سلطتك عليهم ولا لا ؟؟؟؟
ثانيا : حضرتك لما تكون متحكما في إدارة أفراد أسرتك وزوجتك وكله بيعمل اللي على مزاجك أنت ... يعني كلامك هو اللي بيمشي ... مش ده برضو فيه قسوة وتحكم
يعني القسوة = التحكم = السلطة .... يعني الاتنين ينفعوا ... ازاي بتخيرني بينهما وهم قريبين من بعض أصلا ..... يعني لو حضرتك أرسلت قطعة القراءة بتاعت سلطة الأب دي لخبير علم نفس وسألته يعني ايه سلطة أبوية هيقولك اللي أنا قلته ده أنها تحتمل المعنيين .....
يا جماعة حرام والله .... دي لغة يا جماعة ... ومش أي لغة ... دي اللغة العربية ...يعني المفروض أنها لغة مرنة .... لغة حمالة أوجه ويجوز فيها أكثر من رأي .... ازاي حضرتك عاوز تتطلع طالب يقدر يستوعب جميع العقول وجميع الآراء وبتفرض عليه رأي معين ومعنى معين. .....يعني بتقوله محمد مصري ولا مواطن مصري ... مليش دعوة اختار من دووول ... طيب الاتنين صح وعليهم دليل ... ازاي كدة طيب ...
علفكرة أنا بجيب دليل على كلامي ... يعني بقول ليه ده صح وده صح .. مش بقول صح وخلااااص ... وبالتالي السؤال ده كمان لازم تتوزع درجتتتتته ...
___________________________
٤/ قطعة السلطة الأبوية:
سؤال السرد الخارجي ...
... أنا هسأل سؤالا واحدا لأي معلم في وزارة التربية والتعليم ... وأي خبير وضع كتاب المدرسة .... ممكن حضرتك تقولي المصطلح ده موجود فين في كتاب المدرسة عشان نعلمه للطلاب ونشرحه ليهم عشان يعرف يحل السؤال ؟؟؟؟
يا سيدي هو احنا بنختبر الطلاب في ماجستير او دكتوراة في الادب عشان تجيب سؤال زي ده .... هيعرف منين الإجابة .... هذا المصطلح غير مقرر أصلا لا في كتاب اولى ثانوي ولا تانية ولا تالتة ....
وبالتالي يجب توزيع درجة السؤال تماما .... سؤال غير مقرر ... ازاي ياجماعة كدة بس بنختبر الطلاب في حاجات غير مقررررة..... حراااااااام.... يعني السؤال ده لا طلاب ولا معلمين يعرفوا عن المصطلح ده حاجة ... ازاي كدة بس ... هو ده تطوير تعليم ... ولا ايه اللي بنعمله ده بس ... احنا عاوزين بلدنا الغالية مصر تنهض وتتطور ... مينفعش كدة... الحاجات دي بتخلي الطلاب يكرهوا كل شيء ..
_____________________________
٥/ قطعة السلطة الأبوية:
\سؤال: استنتج المغزى من قوله: فما أكثر ما فعل الزمان وانهارت سلطة الآباء !......
لو أنا قلتلك: مروور الزمن قضى على سلطة الآباء وأنه الكاتب زعلان من كدة. .... وقلت لك ما الذي تستنتجه من زعل الكاتب ...
أولا : هل هو لديه حنين الماضي
ثانيا : أم أنه متحسر على الماضي
تعرف تختار ؟؟؟؟؟؟
لو اخترت قولي طيب ..
أنا مش هقعد أعيد وأزيد واقولك أنه الاختيارين ينفعوا وأنه دي اراء ولغة مرنة تتحمل كذا معنى عادي .... ارجع لكتب العلماء واعرف يعني ايه لغة مرنة وانت تعرف أنه كلامي صح ... اذهب لأي خبير لغوي هيقولك نفس اللي أنا بقوله .... وأنه الحنين+ التحسر ... الاتنين ينفعوا عادي
وبالتالي ده سؤال اختياراته خطأ ولازم تتوزع درجته ....
____________________________
٦/ سؤال الموازنة بتاع طه حسين ..... ده سؤال كاااااارثي ..... حضرتك يعني ايه تجبله سؤال نص صفحة ... ونحط اختيارات كل اختيار خمس أو ست سطور .....ده ازاي يعني مش فاهم .... يعني الطالب اللي عنده ١٧ سنة ... لما يقرأ السؤال ده واختياراته في عشرة دقائق ولا ربع ساعة ده انهي معاييير امتحانات في العالم بتقول كدة ..... ده سؤال لازم تتوزع درجته فورا .... ده كفيل أنه يدمر معنويات الطالب أثناء أداءه للامتحان ويخليه ميكملش الأسئلة ...
ده سؤال يتسأل لينا كمعلمين ... مش يتسأل في امتحان ثانوية عامة .... امتحانات ثانوية عامة اختيارات يبقى لازم الاختيارات يكون حجمها أو مساحتها فنية ودقيقة .... مش كدة خالص ...
ده غير أنه أصلا الاختيار الف وجيم قريبين جدا ... أنا عارف أنه جيم أدق ... بس ماشي مفيش مشاكل .... بص على السؤال كدة وقولي رأيك في طوله ايه ....
ده سؤال المفروض يتلغي مش عشان الاختيارات غلط لا ..... عشان يبقى. حضرتك حققت مفهوم الرحمة والإنسانية .... ايه ده يا جماعة .. كل ده سؤال
_________________________
٧/ قطعة القدس ...
سؤال بيقول ما الفكرة الرئيسة الفقرة الرابعة ....
بص يا فندم انت عندك الفقرة الرابعة بتتكلم عن كنيسة القيامة ...... وحاطط اختيارات عن زخرفة مسجد قبة صخرة وحاجات تبع المسجد الأقصى ....أنا مش فاهم ايه ده يعني حضرتك عايز تحقق مفهوم وحدة عنصري الأمة في السؤال ولا ايه ......
اه صح نسيييت حضرتك هتقولي آسف آسف كنا نقصد نقول الفقرة الثالثة ..... هقولك بجد ... انت فاهم معنى اللي بتقوله ايه ...... حضرتك بتعترف انك مستهتر في وضع امتحان ثانوية عامة ... وبتعترف أنه الامتحان متراجعش من الخبراء اللي قال عليهم الوزير أنهم بيراجعوا الامتحانات والأسئلة ..... حضرتك ده امتحان ثانوية عامة .... مش امتحان حضانة عشان تغلط في صياغة أسئلته واختياراته .... احنا كدة بنهزززززر .... اللي عامل البلاوي ده لازم يتحقق معاه ويتحااااسب ...
ده سؤال كماااان غلط لازم تتوزع درجته فورا ...
_________________________
٨/ قطعة القدس ...
سؤال هات الدليل من الموضوع ما يفند مزاعم الصهاينة في حقهم التاريخي في القدس ....
يعني بتسألني على الدليل اللي نقدر بيه نكذب الصهاينة ونقولهم لا القدس مش بتاعتكم .....
طيب حضرتك اقرأ الاختيارات كدة وقولي ... هل الاختيارات دي دليل منطقي للرد على السؤال .....
طيب ايه رأيك في آخر اختيارين بتوع أنه القدس بها معالم مسلمين ومسيحيين فقط + الاختيار بتاع القدس بها معالم مهمة للمسيحين والمسلمين ....
ايه رأيك حضرتك ... نختار ايه بقى ....... هتقولي نختار بتاعت فقط دي .... هقولك يعني مينفعش الاختيار بتاع أنه القدس بها معالم مهمة للمسلمين!!!!!.... مينفعش يعني متأكد .....
أنا مش عارف يعني اقول ايه بجدددد.... يعني دي اختيارات ترضي ربنا ..... حرام سؤال زي ده بالاختبارات غير المنطقية العشوائية دي متتوزعش درجته ...
________________________
٩/ نص ميخائيل نعيمة :
____________
سؤال بين المبدأ الأخلاقي الذي طبقه الشاعر في البيتين...
يعني حضرتك أول بيتين الشاعر قرر أنه يفلس ويتخلى عن الفلوس والهبات اللي بياخدها من الناس ويبقى زاهد ويبعد عن الناس ويرتاح منهم لأنهم بسبب الكرم اللي بيقدموه ليه كانوا سارقين عقله وقلبه ....
دلوقتي أنت بقى بتخيره ايه اللي فهمته من أول بيتين وبتقوله :
أولا : هل فهمت أنه قرر يتعرض للمخاطر عشان حريته ويبعد عن العبودية مهما كانت المخاطر ... اكيد طبعا دي حاجة مفهومة لأنه قرر يفلس وميبقاس معاه فلوس ويتعرض للخطر من أجل حريته ...... لأنه قالك مينفعش ابقى ذليل عشان سلامتي والفلوس ...
ثانيا ؛ ولا فهمت أنه عاوز يحقق الراحة والطمأنينة بالبعد عن أذى الناس .... اكيد برضو دي صح لأنه قال كدة في البيتين ....
طيب أبوس ايدك اختار انت بقى اختيار من الاختيارين السابقين. .... هل تقدر تقولي أنه الاختيارين دووول مش واضحين في الاختيارات... ومناسبين جدا المعنى المفهوم ؟؟؟؟!!!!!!!!!
سؤال لازم تتوزع درجته فووووورا..
___________________________
١٠/ نص ميخائيل نعيمة :
سؤال ما عاطفة الشاعر ....
اولا : الشاعر اكيييد عاوز يعتزل الناس لانهم سبب هموممه وظنونه وألمه ...
ثانيا : الشاعر اكيد برضو عاوز يعتزل الناس عشان يعيش في عالم الزهد والصوفية ....
العاطلين دووول واضحين جدا في كلامه ....
طيب انت كممتحن بتخيرني بينهما ليه ..... يعني أنا دلوقتي فهمت الاتنين دووووول .... اختار ايه بقى ...
اوعى تقولي فيه واحدة أرجح من التانية .... هرجع واقولك هو أنا كل شوية هقول أنه اللغة والنصوص بالذات حماااااالة أوجه ....افهم الحتة دي ابووووس ايدك افهمها....
مينفعش تجبله في الاختيارات وجوها كثيرة مفهومة من النص وتقوله اختار دي أو دي ... ازاي يا جماعة مدة بنهدم اللغة ...والله العظيم بنهدمها ... لو احنا فضلنا كدة والله العظيم هنطلع جيلا عقيما ... اللغة مرررررررررررررنة ... افهموا بقى الحتة دي أرجوووووكم
وبالتالي لازم السؤال ده تتوزع درجته فووووورا
_______________________
١١/ نص ميخائيل نعيمة :
السؤال بتاع.. يقول ميخائيل النقاد عن ميخائيل نعيمة : أنه عاش في زهد وصوفية وبعد عن الناس وكان متفائلا بالمستقبل تماما ....
طيب حضرتك بتسأله دلوقتي ما الذي يدل على ذلك من الأبيات... وبتخيره بين
١/ هل الذي يدل هو أنه الشاعر زاهد فيما بين أيدي الناس والدليل قوله غدا أرد هبات الناس للناس
٢/ هل الذي يدل هو أنه الشاعر كان متفائلا بالحرية والمستقبل بسبب نزعته الصوفية والدليل قوله :أطلق الروح أجوز حدود السمع والبصر .....
طيب ايوة وبعدين يعني نختار ايه يعني ... ما الاتنين صح حضرتك .... ولا فيها اعتراض دي ؟؟
سؤال لازم تتوزع درجته ومش هقعد أعيد اللي قلته فوق عشان تعبت من كتر الكلام ....
__________________________
١٢/ أخطاء نحوية في امتحان لغة عربية ...
هل تتخيل أنه الممتحن اللي بيسأل الطالب سؤال وعاوزه يحله صح ... هو أصلا عنده غلطات .... يعني حضرتك جايب شخص أصلا بيغلط في اللغة وعاوزه يحط امتحان للطلاب في اللغة ...... يبقى ايه الناتج ... الناتج أنه الامتحانات تتطلع بالشكل الجميل ده ..... خد عندك الغلطتين دول في الامتحان الثاني بتاع أدبي شوفتهم وأنا ببص بنظرة سريعة على الامتحان ..... انا اصلا لسة مشوفتش الامتحان كاملا ... بس اكيييد هيبقى مليان أخطاء ...... اكتب عندك الغلطتين دووول :
١/ ليس ذا المروءة بطعان..... الجملة مكتوبة كدة .... هل الممتحن لا يعلم أنه اسم ليس مرفوع وبالتالي المفروض تنكتب ذو مش ذا
٢/ لعل أبناءنا بانين..... هل الممتحن لا يعلم لانه خبر لعل بيبقى مرفوع ...... والمفروض بانون مش بانين...
اوعى حد يقولي أنه هو قاصد يكتبها غلط...... هقولك لا طبعا لانه السؤال مبيقولش صوب الخطأ..... ده بيقولك ضع أداة بدلا من أداة ..
٣/ ده غير خطأ نحوي في أول امتحان ... لما قال ... لفظتي أصلان في سؤال قطعة سامي ومفيد..... المفروض لفظتا أصلان عشان لفظتا مبتدأ ...