تجارب احد حجاج بيت الله فى اداء فريضة الحج
خلاصه تجربتي لعل حد يستفيد منها1_تجهزوا حضراتكم الشنط من الوقت لان مش بتعرف يوم السفر الا قبلها بيومين او ثلاثه بالكتير بتستلموا الباسبور والتذكره وكرت التعارف والاسوره كتب تعليمات
بتستلموا من القسم التابعين له للرجال طقم احرام بشكير للرجال وعبايه وقميص وبنطلون وطرحه للسيدات في جراب بلاستك ها انزل صورتها
2_بتاخدوا معاكم الادويه الضروريه للبرد والصداع والمغص والاسهال والادويه الدوريه لو فيه مريض بتاخدوا كميه الادويه بتاعتكم تكفي الشهر مده الحج لأن العلاج هناك غالي
3 اللي اول مره يسافر السعوديه مياه الحنفيه مش للشرب هي للاستعمال المنزلي غسيل، حموم نضافه، اما الشرب فميه زمزم او ميه معدنيه (بتستلموا مع الاكل)
باب الحرم اللي دخلتم منه تحفظ رقمه علشان تخرج منه لان ده أقرب مخرج للسكن بتاعك ولو خرجت من باب تاني ها تلاقي نفسك في مكان مختلف الكلام ده في مكه اوالمدينه
3_بالنسبه للأكل
حج القرعه مش فيه وجبات مطبوخه غير في مني وعرفه
حضرتكم بتستلموا كرتونه فيها وجبات جافه عباره عن ( فول مدمس، جبنه بيضا، جبنه نستو، تونه، مكعبات مربس، كيس عيش توست، تمر، عصير، بسكوتات، ميه معدنيه)
كرتونه في المدينه صغيره وكرتون في مكه ودي بتكون العدد فيها كبير علشان المده في مكه طويله لان مده المدينه 4ايام فقط
لو ها تاخد معلبات بلاش الأصناف دي ممكن لو ها تاخد حاجه مختلفه وبتاخد شاي وسكر
4_اللي حابب يعمل اكل واحده معاه مافيش مشاكل الفنادق معظمها مش فيها مطبخ
حضرتك بتاخد معاك شعله او بتشتريها من هناك معظم الفنادق في مكه كانت موفره غرفه في كل دور فيها ديب فريزر أفقي كبير
لو ها تاخدوا اكل معاكم يبقي شنطه هاند باج بقفل وتشيل فيها اكلك في الفريزر علشان مش تتغلط باكل حد تاني ولو ها تعملوا.الاكل بتشتروا اللحمه ومعاها كيلو دهن او ليه خروف بتتقطع الليه ومعاها شويه سمنه لحد ما تسيح شويه وتنزلوا باللحمه معاها لحد ما تنزل ميتها وتشربها لو لسه ناييه زودوا كميه ميه قليل بقليل لحد ما تقرب علي السوي ها تضيفوا حبهان ومستكه وفلفل وملح وسيبها تنشف ميتها خالص يبقي السائل اللي فيها هو الدهن فقط تترك لحد ما تبرد وتقسمها في اكياس كل كيس علي قد الوجبه وتجمد في الفريزر قبل السفر علي الاقل بيومين علشان تضمن انها جمدت تماما
الكفته بتتجهز وتتحمر وتجمد أيضا كل كيس على قد الوجبه.. بتاخد ا معاكم رز ومكروه وسمن وملح وحلل واطباق وملاعق وسكين وكوب للاستعمال... وطبعا شاي وسكر
5_لو ها تشتري اكل من بره
ها تلاقي حضرتك المطاعم منتشره طول الطريق. انا اللي عجبني مطعم الدهان وده مصري ومطعم البيك.. كما بتشتري منهم الوجبات الوجبه في حدود من 10 :20ريال علي حسب ما تفضلوا
6 _بالنسبه للشنط مسموح بشنطتي متوسطتين لا يزيد وزن الاثنين عن 46 كيلو وهاند باج علي الطياره لا تزيد عن 8 كيلو ويفضل يكون معاكم شنطه ظهر ها تريحكم جدا وخصوصا في مني وعرفه
الشنط بتتاخد منكم في مطار مدينه الوصول يعني لو رايحين مكه الأول بتنزل ا تخلصوا الإجراءات وتستلموا الشنط وانتم خارجين المشرفين بيستلم ها منكم وبتتشحن في شاحنات وحضراتكم بتركبوا الاتوبيسات ومش بتستلموها الا في الفندق وكذلك في التحرك من مكه للمدينه او العكس فالشنط ممكن تتأخر لذلك يفضل وضغ غيار وفوطه صغيره والادويه الاساسيه في الشنطه الهاند باج اللي معاكم علي الطياره لما توصلوا الفندق تاخدوا دش وغيروا ونزلوا تصلوا والشنط توصل علي مهلها من غير قلق وكذلك اكل ليوم الوصول في الهاند باج برضه
7 _بالنسبه للملابس
كل واحد يلبس اللي يريحه
يعني الرجال اللي بيرتاح في جلاليب يلبس جلابيه واللي بيرتاح في بنطلونات يستعمل اللي يريحه
والسيدات سواء عبايات او اسدالات اللي يريحك يفضل تاخدي هدوم بكم وقماش قطن او فاسكوز وبنطلون قطن من تحتها علشان تحملوا الحر هناك يفضل يكون مع السيدات شال خفيف اللي تحب تريح في الحرم تتغطي بيه وتبقي مستوره وملايه علشان مني وعرفه
اهم حاجه يكون معاكم حذاء او شبشب مريح علشان المشى مسافات طويله
8_بالنسبه للغسيل حضرتك بتاخد مسحوق غسيل ومشابك فيه فنادق كانت موفره غسالات وفيه لا بس الغالب موفر سطح لنشر الغسيل
9_بالنسبه للاتصالات
حضراتكم بتشتروا شريحه تليفون سعودي من اي مكان سواء المطار او في الشارع او اي منفذ بيع بياخد بياناتكم من كرت التعارف اللي حضرتك مستلمه مع الباسبور وبياكد بالبصمه وتشحن انا شحنت باقه عاديه الأول بس خلصت بسرعه بعد كده شحنت باقه نت ب 50 ريال ودي كنت باكلم انا وزوجي منها بدلا من المكالمات الداخليه وبتكلم أولادي في مصر
احسن عروض بتاع شركه موبايلي
احسن برامج نت اتصال شغاله هناك
الماسنجر والايمو شغالين فيديو، و صوت
الباقه كفت الشهر والاستقبال في الفندق فيه واي فاي بيكتبوا الباس وارد بتاعته ودخلوا منها بس مع الزحمه مش بيلحق يحمل
احيانا في الحرم المكي الموبايل كان بيلقط
واي فاي مفتوح ويشتغل عادي بس بالصدفه